السلام عليكم ورحمة الله وبركاتة
تدرون نتايح الدراسات ليست حقيقيه؟ ليش؟
لان الباحثين و العلماء الي جمعوا البيانات يستنتحون على وجهة نظرهم أغلبية الدراسات صممت لجمع البيانات لإستنتاج نظريات و أي باحث و عالم يقدرون يلعبون بتصميم او بطريقة تنفيذ الدراسه عشان النتيجه تطلع لصالحهم على سبيل المثال أقدر أجمع معلومات عن مبيعات دجاج كنتاكي في سنه 2014 بنفس الوقت اقدر اجمع معلومات عن نسبة الطلاق في سنة 2014 بعدين انشر نتايح الدراسه و اقول نسبة مبيعات دجاج كنتاكي في سنة 2014 ارتفعت مع نسبة الطلاق وأستنتج دجاج كنتاكي اهو سبب نسبة الطلاق المرتفعه شفتوا هالطريقه؟ نفذوها لما قالوا 1 مشروبات الدايت تسمن (طل) 2 اللحوم الحياوانيه مسرطنه و تسمن (طل) 3 الريوق المبكر ينشط الايض (طل) 4 الريوق المتأخر يسمن (طل) لو هالاستنتاجات معتمده جان أنا و أغلبية عملائي متان و مرضه مثال ثاني أقدر اجمعلي مجموعتين متان اول مجموعه اعطيهم نظام غذائي مع رياضه و حبوب تخسيس ثاني مجموعه اعطيهم نفس الانظمه بدون حبوب التخسيس يعد 3 أشهر المجموعه الي خذوا الحبوب خسروا نص كيلو اكثر من المجموعه الثانيه بهالحاله اقدر انشر الدراسه واقول ان الحبوب لها مفعول ايجابي للتخسيس طل بعين العدو.... نص كيلو شنو؟! هالطريقه نفذوها على أغلبية المكملات الغذائيه و في دراسات ممتازه بس ما تناسب فئه معينه على سبيل المثال اكتشفوا ماده معينه لها فوايد عجيبه ولكن تضر الرياضيين او العكس أو دراسه نفذوها على حيوانات نفس دراسة السكريات الصناعيه الي غثونا فيها عطوا فيران نسبة سكر صناعي الي حتى 100 أدمي ما ياخذونها لي يومكم مستغرب شلون الفيران ما انفجروا ________ استنتاجية الدراسات ما تعطيكم لا حق ولا باطل لانها وجهة نظر العلماء الي نفذوا الدراسه و حتى لو الدراسه قويه راح يطلع عالم ثاني ويحاول يثبت ان نظريتهم خاطئه و شلون تعرفون الفرق بين الدراسات الزينه والخربوطه؟ كالآتي: السؤال الي انطرح عن الدراسة مناسب للبحث والا الباحث يستعبط؟ الدراسه تضيف شي يديد والا العلماء محششين؟ تصميم الدراسة مناسب لسؤال البحث والا قاطين نكته؟ نفذوا الدراسه وفقا للبروتوكل الاصلي والا مع الخيل يا شقرا؟ حللوا الاحصائيات بشكل صحيح والا ما يشوفون شر؟ البيانات تبرر استنتاجات والا بطتنا بطة بطتكم؟ في اي تضارب في المصالح؟ او منو مول الدراسه؟ هذي الاسئله الي لازم تنطرح اثناء مراجعة اي دراسه الطريقه الثانيه: صيروا فيران تجارب
الأحد أغسطس 08, 2021 9:36 pm من طرف 
