المزاج عدو الرجيم..

السلام عليكم ورحمة الله وبركاتة

يا عرب نحن مجتمع نعشق المزاج نحن مجتمع نحتاج مزاج للمزاج اذا ما قعدنا و شربنا قهوتنا مع كاكاونا و صورنا كأن ما سوينا شي تخيلوا ماشين على نظام زي الفل لمدة اسبوع و فجأه مزاجكم يطق فوق تحت شتسوون؟ شترقعون؟ خلاص؟ نهاية العالم؟ نتريق كنتاكي؟ شهالمزاج؟ منو يتريق كنتاكي؟ الجواب مادري منو يتريق كنتاكي بس لازم تمشون على مزاجكم والا نهاية العالم شلون؟ اولا لازم تعرفون هذا شي طبيعي و اذا مشيتوا على مزاجكم بطريقه اعتداليه (صحيه) ماكو الا العافيه الحالات المزاجيه
1 مالكم خلق تاكلون. اكبر غلطه تاكون اذا مو يواعه والرسول عليه الصلاة والسلام نهى عن هالشي هذا مزاج زين
2 تبون اختيار يديد. البيض على الريوق طلع من جبودكم و تبون شي سريع و حالي من صباح الله خير نفس الWhite Chocolate Mocha. عااااادي مع ان هالمشروب مصيبه و متروس سكريات. حاولوا تفكرون بإختيار صحي غير الوجبه الي بالنظام بس شربوا الموكا الي احتمال تزيد نسبة الكولستورول والسكر عشان تصبرون مزاجكم الي ما يدري وين الله قاطه
3 توكم توكم توكم مبلشين النظام و تبون تاخذون بريك. يخرب بيت هالمزاج بس لازم تراعونه (يالدلوعين) اكلوا الي تبونه بإعتدال لما المزاج يتعدل يعني نص صمونه من ستاربكس مع لاتيه (حليب خالي الدسم) و شوية كاكاو كوجبه خفيفه بالدوام و شوية رز مع الغدا و لاتيه ثاني مع شوية كاكاو المغربيه و سكروا حلوجكم بالليل
4 مالكم خلق تروحون النادي لان زحمه بس حدكم عيارين لان مو زحمه.
المزاج يخليكم تقصون على عمركم و تطلعون اعذار لا تروحون النادي بس لا تقعدون تجابلون الطوفه او التلفزيون. الكسل مصيبه و راح يسحب معاكم سحبه مو طبيعيه. حاولوا تطلعون بس لا تروحون مطاعم ولا يمعات فيها اكل دسم والجو متعدل الحمدلله شفيه الممشى؟
5 حبطوا المزاج. لي متى وانتوا بتدلعون؟ جابلوا المنظره و فكرا لي متى احنا جذي؟ الهنود وصلوا المريخ وانا صارلي 20 سنه احاول اضعف ليش؟
6 غيروا نظامكم اذا المزاج طول. راجعوا الاخصائي او كشتوا فيه و روحوا سوق او جمعيه فيها منتجات صحيه عشان تشترون بدائل على ما-زا-جكام
7 تابوعني و راجعوا مواضيعي. خوش دعايه صح؟ بس لا من صجي ترا تكلمت عن تقريبا كل شي للالتزام بنمط حياة صحي ترا انا اكبر دلوع و مزاجي الفرق بيني و بينكم اني درست مزاجي و عرفت شلون اتعامل معاه منشنو المزاجيين